पूरग्रस्तांच्या मदतीला CSRची भक्कम साथ;
जनतेचा वाली | पालघर | प्रतिनिधी
पालघर जिल्ह्यात अलीकडील अतिवृष्टी आणि पुरामुळे बाधित झालेल्या हजारो कुटुंबांच्या मदत व पुनर्वसनासाठी जिल्हा प्रशासन युद्धपातळीवर कार्यरत असताना, उद्योग क्षेत्रातूनही सामाजिक बांधिलकीचे दर्शन घडत आहे. कॉर्पोरेट सामाजिक दायित्व (CSR) उपक्रमांतर्गत निऑन फाउंडेशन आणि सनटेक फाउंडेशन यांनी जिल्हा प्रशासनाला मोठे सहकार्य करत पूरग्रस्तांसाठी एकूण ४,१०० मदत किट्स उपलब्ध करून दिल्या आहेत. त्यामुळे प्रशासनाच्या मदत मोहिमेला मोठे बळ मिळाले असून अनेक कुटुंबांना तातडीचा दिलासा मिळाला आहे.
जिल्हाधिकारी डॉ. इंदू राणी जाखड यांच्या नेतृत्वाखाली जिल्हा प्रशासनाने बचाव, पुनर्वसन, पंचनामे, आर्थिक मदत आणि अत्यावश्यक सेवा पूर्ववत करण्याचे काम सातत्याने सुरू ठेवले आहे. या प्रयत्नांना पूरक म्हणून निऑन फाउंडेशनने ३,१०० बिगर-अन्न (Non-Food) मदत किट्स, तर सनटेक फाउंडेशनने १,००० अन्नधान्य किट्स उपलब्ध करून दिल्या.
पूराचा सर्वाधिक फटका बसलेल्या तलासरी, डहाणू आणि पालघर तालुक्यातील नागझरी परिसरात या मदत किट्सचे वितरण करण्यात आले. त्यामध्ये तलासरी येथे २,०००, पालघर (नागझरी) येथे ६०० आणि डहाणू येथे ५०० बिगर-अन्न मदत किट्स देण्यात आल्या.
प्रत्येक मदत किटमध्ये ब्लँकेट, चटई, टॉवेल, वैयक्तिक स्वच्छतेचे साहित्य, ORS टेट्रा पॅक तसेच दैनंदिन वापरातील अत्यावश्यक वस्तूंचा समावेश करण्यात आला आहे. पूरानंतर घरातील जीवनावश्यक साहित्याचे मोठे नुकसान झालेल्या कुटुंबांसाठी ही मदत महत्त्वाची ठरत आहे.
सनटेक फाउंडेशनने उपलब्ध करून दिलेल्या १,००० अन्नधान्य किट्समध्ये तांदूळ, गहू, साखर, खाद्यतेल, चहा आणि इतर आवश्यक जीवनावश्यक वस्तूंचा समावेश असून, पूरग्रस्त कुटुंबांच्या अन्नसुरक्षेची तातडीची गरज पूर्ण करण्यात यामुळे मदत झाली आहे.
याशिवाय, सुरक्षित पिण्याच्या पाण्याची समस्या लक्षात घेऊन निऑन फाउंडेशनने नागझरीसह सर्वाधिक प्रभावित भागांमध्ये सलग चार दिवस तीन आरओ (RO) पाणी टँकर उपलब्ध करून दिले. नियमित पाणीपुरवठा सुरळीत होईपर्यंत या उपक्रमामुळे नागरिकांना स्वच्छ पिण्याचे पाणी उपलब्ध झाले.
महिला आणि किशोरवयीन मुलींच्या आरोग्याचा विचार करून निऑन फाउंडेशनने २,००० सॅनिटरी हायजीन किट्स देखील उपलब्ध करून दिल्या आहेत. या किट्सचे वितरण डहाणू येथील आश्रमशाळांमध्ये शिक्षण घेणाऱ्या विद्यार्थिनींना करण्यात येणार असून पुनर्वसनाच्या काळात त्यांच्या आरोग्य आणि स्वच्छतेसाठी हा उपक्रम उपयुक्त ठरणार आहे.
या मदत मोहिमेचे मार्गदर्शन निऑन फाउंडेशनचे विश्वस्त प्रविण जैन यांनी केले. त्यांच्यासोबत प्राची जैन, संध्या पाटील, निऑन लॅबोरेटरीज लिमिटेडच्या वरिष्ठ अधिकाऱ्यांसह फाउंडेशनचे स्वयंसेवक आणि कार्यसंघाने मदत साहित्य अल्पावधीत गरजूंपर्यंत पोहोचविण्यासाठी समन्वयाने काम केले.
दरम्यान, जिल्हा प्रशासनाने निऑन फाउंडेशन आणि सनटेक फाउंडेशन यांच्या वेळेवर मिळालेल्या सहकार्याबद्दल कृतज्ञता व्यक्त केली. शासनाच्या मदतकार्याला पूरक ठरणाऱ्या अशा CSR भागीदारीमुळे मदत अधिक वेगाने आणि प्रभावीपणे गरजूंपर्यंत पोहोचत असल्याचे प्रशासनाने स्पष्ट केले.
जिल्हाधिकारी डॉ. इंदू राणी जाखड यांनी सांगितले की, जुलै महिन्यात सुरू झालेल्या अतिवृष्टीपासून जिल्हा प्रशासन बचावकार्य, पंचनामे, आर्थिक सहाय्य, अत्यावश्यक सेवा पूर्ववत करणे आणि सार्वजनिक पायाभूत सुविधांच्या दुरुस्तीचे काम सातत्याने करत आहे. शासनाच्या नियमानुसार पात्र पूरग्रस्तांना आर्थिक मदत वितरित केली जात असून, उद्योग, CSR संस्था, स्वयंसेवी संघटना आणि सामाजिक संस्थांच्या सहकार्यामुळे पुनर्वसनाचे काम अधिक गतिमान झाले आहे.
“प्रत्येक पात्र पूरग्रस्त कुटुंबापर्यंत वेळेत आणि प्रभावीपणे मदत पोहोचविण्यासाठी जिल्हा प्रशासन कटिबद्ध आहे. समाजातील विविध घटकांनी दाखविलेली सामाजिक बांधिलकी ही आपत्तीच्या काळात मोठी ताकद ठरते,” असेही जिल्हाधिकारी डॉ. इंदू राणी जाखड यांनी नमूद केले.
