“आरक्षण सोडतीत उलथापालथ — इच्छुक पदाधिकाऱ्यांना फटका, महिलांना वाढलेली संधी”
“पालघर जिल्हा परिषदेच्या आरक्षण सोडतीत प्रस्थापितांना धक्का”
जिल्हा परिषद ५७ जागांसाठी आरक्षण जाहीर
पालघर (जनतेचा वाली प्रतिनिधी)
पालघर जिल्हा परिषदेच्या एकूण ५७ जागांसाठी आरक्षण जाहीर करण्यात आले असून, या आरक्षणात अनेक मावळते पदाधिकारी आणि इच्छुक उमेदवारांना फटका बसला आहे. विशेषतः किनारपट्टी व औद्योगिक पट्ट्यातील महत्त्वाच्या गटांमध्ये महिलांसाठी व मागास प्रवर्गांसाठी आरक्षण ठरल्याने अनेक दिग्गजांचे राजकीय गणित कोलमडले आहे.
जिल्ह्यातील १५ लाख ७० हजार ८४ लोकसंख्येच्या पार्श्वभूमीवर आरक्षणाची आखणी करण्यात आली. त्यापैकी २७ हजार १६५ नागरिक अनुसूचित जातीचे, तर १० लाख ५ हजार ६९४ नागरिक अनुसूचित जमातीचे आहेत. शासननिर्देशांनुसार अनुसूचित जातींसाठी १, अनुसूचित जमातींसाठी ३७, नागरिकांचा मागास प्रवर्गासाठी १५, तर महिलांसाठी एक जागा आरक्षित करण्यात आली आहे.
हा आरक्षण सोडत कार्यक्रम सोमवारी दुपारी जिल्हाधिकारी कार्यालयात पार पडला. जिल्हाधिकारी डॉ. इंदू राणी जाखड यांच्या अध्यक्षतेखाली हा कार्यक्रम पार पडला, तर उपजिल्हाधिकारी रणजीत देसाई यांनी सहकाऱ्यांच्या मदतीने सोडत प्रक्रिया पूर्ण केली. यावेळी राजकीय पक्षातील पदाधिकारी कार्यकर्ते पत्रकार मोठ्या संख्येने उपस्थित होते
🔸 आरक्षणाचा तपशील
अनुसूचित जाती (महिला) : पास्थळ
अनुसूचित जमाती : बिनवड, आंबेसरी, उपलाट, वसा, चारोटी, कैनाड, दाभोण, वडवली, कुझे, वरसाळे, आशागड, मलवाडा, हालोली, बोर्डी, धुकटण, सरावली, भाताणे, गालथरे
अनुसूचित जमाती (महिला) : वावर, झाप, जव्हार ग्रामीण, दादडे, मोडगाव, तलवाडा, सूत्रकार, चळणी, ब-हाणपूर, खोडाळा, डोंगारी, आंबोली, शिगाव, आसे
नागरिकांचा मागास प्रवर्ग : सातपाटी, कुडूस, मनोर, तारापूर, बोईसर वंजारवाडा, चंद्रपाडा, चिंचणी
नागरिकांचा मागास प्रवर्ग (महिला) : दांडी, एडवण, खैरापाडा, केळवा, उंबरपाडा नंदाडे, बोईसर, माहीम, अर्नाळा किल्ला
सर्वसाधारण महिला : सरावली
खुला (सर्वसाधारण) : कळंब, धाकटी डहाणू, खुपरी
—
🔹 प्रस्थापितांचे मनसुबे धुळीस
या आरक्षणात अनेक मावळत्या पदाधिकाऱ्यांचे राजकीय समीकरण उद्ध्वस्त झाले आहे.
मावळते अध्यक्ष प्रकाश निकम यांचा तारापूर गट नागरिकांचा मागास प्रवर्गासाठी राखीव झाला आहे.
मोखाडा तालुक्यातील तिन्ही जागा अनुसूचित जमाती (महिला) प्रवर्गासाठी राखीव झाल्याने त्यांचा प्रभावक्षेत्र कमी झाले.
माजी अध्यक्षा वैदही वाढाण यांचा दांडी गट मागास प्रवर्गासाठी तर पास्थळ गट अनुसूचित जातीसाठी राखीव ठरल्याने त्यांना देखील फटका बसला आहे.
मावळत्या सभापती मनीषा निमकर, संदेश ढोणे, संदीप पावडे यांचे गटही आरक्षणात अडकले असून, त्यांना नवीन पर्याय शोधावे लागतील.
माजी सभापती काशिनाथ चौधरी यांना महिला आरक्षणाचा फटका बसला आहे.
मात्र, माजी अध्यक्षा सुरेखा थेतले आणि मावळते अध्यक्ष पंकज कोरे यांच्या मतदारसंघांसाठी काहीशी अनुकूलता दिसून आली आहे.
महिलांसाठी अनुकूल आरक्षण
औद्योगिक विकास झालेल्या बोईसर, खैरापाडा परिसरातील जागाही महिलांसाठी राखीव झाल्या आहेत. त्यामुळे आगामी जिल्हा परिषद निवडणुकीत महिला उमेदवारांचा प्रभाव वाढण्याची शक्यता आहे.
आरक्षण सोडतीतून पालघर जिल्ह्यातील राजकीय समीकरणात उलथापालथ होण्याची चिन्हे स्पष्ट दिसत आहेत. आगामी निवडणुकीत नव्या चेहऱ्यांना संधी मिळेल, पण अनुभवी नेत्यांना पुन्हा मांडणी करत आपले घडी बसवावी लागेल .