मुंबई: महाराष्ट्रात महिला शेतकरी प्रमाणपत्रासाठी आतापर्यंत ३७,९३,०५१ अर्ज प्राप्त झाले आहेत, अशी माहिती कृषी मंत्री दत्तात्रय भरणे यांनी दिली. शेती करणाऱ्या महिलांना स्वतंत्र शेतकरी म्हणून अधिकृत ओळख देण्यासाठी ही योजना सुरू करण्यात आली आहे.
७ ऑक्टोबरपर्यंतच्या आकडेवारीनुसार, ८९५ ग्रामपंचायतींमध्ये ग्रामसभा घेण्यात आल्या असून, ६८,४३६ महिलांना प्रमाणपत्रे देण्यात आली आहेत. ग्रामसभेनंतर १५ दिवसांत प्रमाणपत्र वाटप केले जाते. ही मोहीम १७ सप्टेंबर ते १७ ऑक्टोबर दरम्यान सेवा संकल्प अभियानांतर्गत राबवण्यात आली.
जिल्हानिहाय अर्जांमध्ये यवतमाळ जिल्हा २,५३,४३९ अर्जांसह अव्वल आहे. त्यानंतर सातारा २,१४,७८७, नाशिक २,१०,३२७, अमरावती २,०५,०७४ आणि पुणे १,७३,०४९ अर्जांसह पुढे आहेत. बुलढाणा, अहिल्यानगर, छत्रपती संभाजीनगर, सोलापूर, नंदुरबार, जळगाव, नांदेड, धाराशिव, धुळे, बीड आणि जालना या जिल्ह्यांमध्येही एक लाखांहून अधिक नोंदणी झाली आहे. तालुकानिहाय सातारा जिल्ह्यातील कराड तालुक्यात सर्वाधिक ३५,४२२ नोंदणी झाली आहे.
या प्रमाणपत्रामुळे महिला शेतकऱ्यांना शासकीय कृषी योजना, लाभ आणि पतपुरवठा यांचा लाभ घेता येईल. ज्या महिलांनी अद्याप नोंदणी केलेली नाही, त्यांनी लवकरात लवकर ऑनलाइन प्रक्रिया पूर्ण करावी, असे आवाहन कृषी विभागाने केले आहे. जमीन स्वतःच्या नावावर असणे या प्रमाणपत्रासाठी आवश्यक नाही.
स्त्रोत: महाराष्ट्र कृषी विभाग
