पालघर, दि. २० — पालघर येथील आर्यन एज्युकेशन सोसायटीच्या म. नी. दांडेकर हायस्कूलचा वार्षिक क्रीडा महोत्सव उत्साहात पार पडला. दिनांक १६ डिसेंबर रोजी सुरू झालेल्या या क्रीडा महोत्सवाची सांगता २० डिसेंबर २०२५ रोजी पारितोषिक वितरण समारंभाने झाली. सुमारे ९७ वर्षांची उज्ज्वल परंपरा लाभलेल्या या शाळेच्या क्रीडा महोत्सवाने विद्यार्थ्यांमध्ये खेळभावना, शिस्त व संघभावना रुजवली.
पारितोषिक वितरण समारंभात आर्यन एज्युकेशन सोसायटी, मुंबईचे अध्यक्ष श्री. केदार काळे यांनी विद्यार्थ्यांना मार्गदर्शन करताना सांगितले की, देशप्रेम, शिक्षण, संस्कृती, खेळ आणि संस्कार ही आर्यन शाळेची पंचसूत्री आहे. स्वातंत्र्यपूर्व काळापासून या संस्थेच्या शाळांमधून देशप्रेमी, सुसंस्कृत नागरिक घडत आले आहेत. शिक्षणाबरोबरच खेळ, कला व संस्कृतीचे संस्कार विद्यार्थ्यांवर घडविण्यावर संस्थेचा भर असल्याचे त्यांनी नमूद केले.
पालघर येथील या हायस्कूलमधून शिक्षण घेऊन अनेक विद्यार्थी उच्च पदांपर्यंत पोहोचले असून, आजही त्यांचे शाळेशी असलेले नाते अतूट आहे, असे सांगत त्यांनी विद्यार्थ्यांचे अभिनंदन केले. “तुमचे पालक भाग्यवान आहेत की त्यांनी तुम्हाला आर्यन शाळेत प्रवेश दिला. तुम्ही आर्य कुमार व आर्य कुमारी आहात,” असे सांगून त्यांनी विद्यार्थ्यांमध्ये आत्मविश्वास निर्माण केला. काळानुसार शाळेत बदल घडत असून, २१व्या शतकातील विज्ञान व संगणक शिक्षण विद्यार्थ्यांना विनामूल्य दिले जात असल्याचेही त्यांनी स्पष्ट केले.
क्रीडा महोत्सवात वैयक्तिक व सांघिक अशा विविध क्रीडा स्पर्धांचे आयोजन करण्यात आले होते. या स्पर्धांमध्ये शेकडो विद्यार्थ्यांनी सहभाग घेतला. विजेत्या व सहभागी विद्यार्थ्यांना बक्षिसे व प्रशस्तीपत्रके देऊन गौरविण्यात आले. आर्यन शाळेचे विद्यार्थी खेळातही राज्यस्तरावर चमकले असल्याचा उल्लेख यावेळी करण्यात आला.
या कार्यक्रमाला संस्थेचे कार्यवाह श्री. जयंत दांडेकर, स्कूल कमिटीचे अध्यक्ष श्री. उपेंद्र घरत, मुख्याध्यापिका सौ. विभूती चौधरी, शिक्षकवृंद उपस्थित होते. क्रीडाशिक्षकांसह सर्व शिक्षकांनी क्रीडा महोत्सव यशस्वी करण्यासाठी परिश्रम घेतले. सामने अत्यंत चुरशीचे झाले असून, या महोत्सवातून विद्यार्थ्यांमध्ये खेळभावना, शिस्त व संघभावना अधिक दृढ होईल, असा विश्वास व्यक्त करण्यात आला.
